چوارەمین ئاهەنگی ساڵیادی زاد لە پایتەخت ساز کرا!

پاش نیوەڕۆی ئەمڕۆ، پێنجشەممەی 20/10/2022 ڕێکخراوی زاد ئاهەنگی کردنەوەی لقی هەولێر بەفەرمی و یادی چوار ساڵەی ڕاگەیاندنی ڕێکخراوەکەی کردەوە. لە ئاهەنگەکەدا کە لە هۆڵی ڕۆشنبیری ساز کرا، سەرۆکی ڕێکخراو: «م. ئەکبەر موحەممەد فەرەج» باسی لە ڕۆڵی زاد کرد لە داهاتوودا و بەڵێنی ئەوەیدا کە وەک چۆن زاد لە لقەکانی تر خزمەتی نەخۆشە هەژارەکانی کردووە، لە هەولێر کاری ناوازەتر بکات.

پاشان «د. عیماد سەدرەدین» بەرپرسی لقی هەولێر، زیاتر لقەکە و کارمەند و خۆبەخشانی ناساند. دواتر «د. عوسمان هەڵەبجەیی» ئەندامی ئەنجومەنی دامەزراندن، باسی لە بەخششی بەخشین کرد و ئاماژەی بەوەدا کە لەو سەردەمەدا زۆرێک هەن خەندەکان دەدزن، بەڵام زاد خەندە پێشکەش دەکات، لەبەرئەوە هاوکاری زاد بن.

لوقمان عەبدوڵڵا بەرپرسی بەشی پڕۆژەکانی زاد، وێڕای ئەوەی ئاماژەی بە پڕۆژەکان کرد، داتای چوار ساڵی ڕێکخراوەکەی بۆ ئامادەبووان ڕوون کردەوە. «م. عەبدولخالقی ڕوناکی» زاد و کارمەندانی ڕێکخراوەکەی لە ڕووی متمانەوە بە میوانەکان ناساند، داوای کرد کە هاوکار و پشتیوانی ئەم ڕێکخراوە بن، چونکە ماڵبەخشین هۆکاری بەختەوەرییە.

 «د. عەبدولواحید موحەممەد ساڵح» هاوکار و خاوەنی بیرۆکەی ڕێکخراوەکە لە ڕێی ڤیدیۆی تۆمارکراوەوە گەورەییی زادی بۆ ئامادەبووان باس کرد و ئاماژەی بەوە دا کە زاد هەمیشە کارە گەورەکان دەکات. جگە لەمانە لە ڕێی داتاشۆوە چەندان کاری هونەری دەربارەی کار و چاڵاکییەکانی ڕێکخراوی زاد نمایش کرا. لە کۆتاییدا زۆربەی میوانەکان بەخۆشحاڵییەوە لەگەڵ خۆیان دەغیلەی خێزانی زادیان بردەوە.